21年運動生涯奪半百獎牌 「神奇小子」蘇樺偉退役

TKT

21年運動生涯奪半百獎牌 「神奇小子」蘇樺偉退役

Kelly Chu

■受腰傷困擾嘅蘇樺偉，決定退役。

1/1■受腰傷困擾嘅蘇樺偉，決定退役。
        香港殘疾運動員蘇樺偉，出征五屆殘奧會，代表香港拎左半百個獎牌，真係香港英雄，而佢喺○八年殘奧會創下嘅二百米賽事世界紀錄，仍然無人打破，但「神奇小子」受腰傷困擾多時，終於決定退役，結束二十一年運動員生涯，但佢會繼續喺香港殘疾人奧委會暨傷殘人士體育協會工作，繼續為體育界付出，Kelly要向佢說聲多謝！

        蘇樺偉出世時患有黃疸病，腦部受損以致痙攣、腦痳痹、嚴重弱聽，但蘇媽媽鼓勵佢參加田徑班，造就呢位跑步奇才喺一九九六年首次踏上阿特蘭大殘奧會，一上場就幫港隊拎左四乘一百米接力賽金牌。過去二十一年來，蘇樺偉頸上獎牌一個接一個，仲係○八年北京殘奧會打破二百米賽事嘅世界紀錄，至今無人匹敵，但不斷訓練同比賽令佢腰痛左十二年，前年仁川殘亞會更因此未能夠得獎，呢位小子日前接受《體路》訪問，終於宣佈退役，媽媽都支持佢嘅決定。

冀退役後為比賽影靚相

　　蘇樺偉話，會繼續喺香港殘疾人奧委會暨傷殘人士體育協會工作，仲話想試下攝影，希望將來為協會嘅比賽影多啲靚相。前體育主播伍家謙喺facebook讚賞蘇樺偉，祝佢退役後生活愉快，繼續跑出人生精采章節！