隔牆有耳： 田少篤爆阿爺假普選

山米

             自由黨榮譽主席田北俊被中央「搣柴」冇得做全國政協委員之後，論政更加暢所欲言，好似噚日佢出席港台節目《城市論壇》論政改，以一對三游說泛民「袋住先」，更不惜化身國王的新衣裏面嗰個誠實小孩，曲線點出阿爺點操控特首小圈子選舉。
佢話1,200人特首選舉，特首得一個老闆就係阿爺，你睇梁振英提名不足300個支持、到選舉時有689票，多咗啲票邊度嚟好清楚啦。
田北俊之後仲話，中央有權唔任命特首，問題係呢個權佢唔會用，否則選咗個泛民出來唔任命咪成為「全世界大笑話」、「中國仲點做強國呀？」所以中央會喺前階段「揀幾個人畀我哋市民揀」。田少簡單幾句，完全將中央如何操弄假普選嘅戲碼戳破，泛民講都口水乾都冇佢咁一針見血呀！  
   

                               
登錄/註冊後可看大圖

李八方