中門大開：建制必勝客

TKT · 發表於 2013-11-27 11:14:17

梁振英落區，又再呼籲支持政府嘅人要多發聲，𠵱家政府全面陷入捱打狀態，梁再嗌破喉嚨，都唔可能改變現狀。政府已將手上大量政治資源分派予愛國愛港陣營，何以在公眾眼中，政府在輿論戰中完全處於劣勢呢？首先，大家要明白，回歸十幾年，建制派經歷三任政府，幾度上落，早已睇透特區政治體制之死位漏洞，就係特首無法掌握政治上嘅賞罰大權，位照攞、地區資源照逗，但實際為政府做幾多，出幾大力，就逐鋪逐鋪同你計。遇到有爭議性政策，通常就先抽水，退開幾步扮中立，發表吓市民啱聽言論。因此好多時在政治角力一開始時，政府已陷入被動，處於守勢。主要原因係特首與建制派，唔係命運共同體，特首政治失敗，唔代表建制派選舉失利，當大家榮辱不能與共時，又點可能成為有戰鬥力嘅團隊呢？

制度戇居　人人屈機
到千辛萬苦，用多種方法令到建制派上船，都未必有得砌，原因在於建制勢力欠政治論述能力。首先現政府雜牌童子軍內閣，水平參差不齊，加上欠缺核心執政綱領，正所謂連思想都未武裝起來，如何上陣對敵呢？而外圍建制勢力，更加不濟，全部紅噹噹政治掛帥，企出嚟已經得啖笑，邊可能攞到中產輿論支持。當政府越依靠自己人，越係以政治劃線，其他有能之士就會彈開，費事被人誤會大家係同一夥。
大家回想港英殖民地年代，當時建制派面孔，在地區中委任一批有公信力意見領袖，好似小學、中學校長、社工、專業人士、地區組織頭目，但全部都係冇明顯政治形象，亦因此當呢批人出面為政府發聲時，普羅百姓會聽，唔會當做黨派立場或傳聲筒。至於行政立法兩局，就係一班經過重重政治考驗，得到布政司認可才能上位。我經常將港英時代范徐麗泰與今日民建聯之星李慧琼相比，范太出任船民小組召集人，做出成績來先至上位，李慧琼不過由政黨提拔，公職表現未見到便已晉身行會。
當然，大家唔好過份抬舉舊建制派，因為佢哋背後真正操盤者，乃一班精英政務官，佢哋唔熟政策唔緊要，因為後面個AO會寫好畀佢哋讀。呢個制度好處係賞罰分明冇得卸膊，但𠵱家多咗一重政黨喺中間，由佢主持賞罰，政府冇say。換句話說，一個建制派即使公職表現差，背後只要有個黨撐，一樣可以扶搖直上。
既然個制度咁戇居，人人可以屈機，試問邊有人會撐梁振英有爭議決策，因為我唔出聲，你又奈我乜嘢何，抽水攞民望先至係今日建制派rational choice，只要背後有黨內大佬撐，或者有西環撐，你又吹得我脹咩？
朋友太多、戰友太少，已經成為特區政府宿命，而且戰友只會越來越少，直至剩低張志剛、陳茂波兩人。

添馬男

登錄/註冊後可看大圖

		自動登錄	找回密碼
密碼			注册