中門大開：元秋是怎樣煉成的

丁一一 · 發表於 2013-1-11 11:12:40

泛民彈劾動議早知唔夠票過，但就有「蔣元秋」出位幫手煽動民憤，佢功能同金毛阿朗、打記者暴躁挺梁阿叔一樣，幫手倒米。「元秋」用男女關係比喻CY大話精，話男人在外對家事唔清楚好平常，將公私混淆，歪理連篇，足證立法會議員沒有最爛，只有更爛。
當傳媒、高官及議員恥笑「元秋」同時，有冇諗過點解咁差劣嘅人，可以繼續廢噏不絕，而民建聯亦任由佢玩癲喪出位。以往民建聯一樣有爛頭蟀，專門同泛民泥漿摔角，如劉江華、陳鑑林，但兩人寸嘴都係正正經經，用辯論方式批評對手。
刻意經營　吸納左派支持
「元秋」之特別，是刻意用街道大娘style、民粹方式、通俗比喻傳達歪理，入屋程度比劉江華及陳鑑林都要高。呢款政客似剛出道的美國佩林（Sarah Palin）、澳洲極右政客漢森（Pauline Hanson），以悍婦形象出現，唔怕人笑，最緊要有sound bite，多曝光。「元秋」並非要取悅中產主流，而係左派街坊大叔同師奶。佢亦唔會介意你唔鍾意，只要佢「目標群眾」啱聽便可以。
曾幾何時，左派群眾就係如此水平，而92年民建聯成立後，努力擺脫落後、左味，意圖打入中產主流，同民主派爭一日長短。民建聯中產化，吸納不少非傳統左派專業人士，好似蘇錦樑呢類，但對傳統左派兩低一高支持者，即低學歷、低收入、高齡群眾，就欠缺情感動員力。「元秋」出身商界，但走基層形象路線，玩民粹，在芸芸建制派新人中，突圍而出，仲搵到大棚近似愛港力一類激進建制派群眾支持。
「元秋」明顯係刻意經營，因為佢每次發表激進演詞，都要睇稿，將事先度好之sound bite，配上激動神情表達，但亦因此欠了一份自然流露，比較生硬。正如周星馳在《喜劇之王》內引述俄國戲劇大師史坦尼斯拉夫斯基「方法演技」所言，要由外而內，再由內而出番外，咁先至自然。只要「元秋」多實踐「方法演技」，我敢保證，她在政壇成就應不低於Pauline Hanson！

添馬男

登錄/註冊後可看大圖

TKT · 發表於 2013-1-11 11:43:00

爛頭蟀, 博乜

		自動登錄	找回密碼
密碼			注册