「成功非僥倖」是真的，當年盧惠光為了練得一身好武功，自小便勤於練武，最終得恩師李修賢賞識而走上了武師這條路。三十多年來，光仔為了僅得一秒的演出，拼了命去打，用盡力去踢，流過的汗，灑過的血，又有誰能夠明白﹖
最愛李小龍
年輕人愛追夢之餘，還愛追捧偶像，自小便迷戀李小龍的盧惠光就是為了偶像，而踏上了武打這條路，大概冥冥中是一種緣份。
「李小龍係我偶像，細細個已經好鍾意佢，就係咁，我就踏上學武呢條路。記得小時候成班同學仔返學時，最鍾意谷行個肚，叫對方用力打自己嚟練腹肌，雖然經常俾人踢到好痛而晚晚返屋企喊，但我從來無放棄過，因為我好鍾意武術﹗細個因為生計，樣樣工都要做，工廠、地盤、街邊小販、送貨以致特約演員咩都試過，後來經人介紹去咗尖沙咀一間Disco做保安，嗰時好多電影幕前幕後人員嚟玩，結果就係一次機會下認識咗恩師李修賢，佢帶我入行做武打，一做就做到?家。」
成功非僥倖
這個世界從來就是一分耕耘，一分收穫，作為一位武師，跌打損傷實在是少不免，難得盧惠光從未想過放棄，相反更是愈做愈起勁。
「咁多年來，跌跌撞撞一定少不免，不過我從來唔會因為咁而放棄。記得曾經試過兩次拍戲受傷而當場暈倒，第一次係接拍《飛鷹計劃》時，我被風扇吸入，繼而撞倒身邊嘅一條柱，一撞就即時暈低咗3秒，當時現場嘅工作人員都唔知我暈咗，不停嗌我個名，後來大家見我無反應，就嚇到即時走嚟我身邊推醒我，畀白花油我聞﹔而第二次就係同趙文卓合拍《麻雀飛龍》，當時被佢一個360度嘅招式踢中條頸，發出巨響之餘我更即時暈低5秒，在場工作人員就立即嚇到Call白車。雖然做武師好辛苦，受傷程度比其他行業高，不過，我的確好鍾意呢份工作。」
有苦自己知
入行三十多年，加入成家班更是廿多年，當中遇過的種種壓力與血汗，實在是旁人難以想像。
「入行多年，最難忘莫過於同成龍大哥拍攝《醉拳》，記得當時真係拍到喊﹗當年同佢拍到最後單打獨鬥嗰幕，記得嗰個半月，日日係咁打，每日踢千幾二千下腳，踢到抽筋咩？唯有晚晚返去壓腿，壓吓壓吓就攰到瞓着咗，之後起身又再返片場繼續打十個鐘，嗰時真係好辛苦好大壓力﹗記得當年喺片場經常聽到﹕『盧惠光，你可唔可以踢好啲？』嚇到我當時一聽到有人嗌我個名，就僵晒之餘，仲唔敢坐成龍大哥架車。」
雙失窮爸爸
誰說「世上只有媽媽好」，與前妻黎淑賢離婚後，盧惠光父兼母職，一方面要為糊口而繼續打拼，一方面又要為一對兒子而操心，認真有苦自己知，難得一對囝囝體恤爸爸的苦況，懂性之餘又乖，大概，已經是光仔最感安慰的事。
「做單親爸爸真係好吃力，男人老狗湊住兩個小朋友，真係唔係一件容易嘅事，特別係佢哋有咩唔舒服，我就更加手騰腳震，即時無晒方向唔知點做，加上我又要繼續做嘢搵銀，所以一直都有一定程度壓力。慶幸屋企位姐姐（傭人）好好，好細心照顧佢哋，我先比較安心。正因為我同兩個仔一直都相依為命，所以我哋感情特別要好。」
採訪﹕龍婉琪 攝影﹕畢紹基
file:///C:/DOCUME%7E1/public/LOCALS%7E1/Temp/msohtml1/06/clip_image002.jpg
| 
雷达卡
發表於 2012-7-26 11:57:19
置顶卡
喧嚣卡
变色卡
显身卡