中門大開：以鬥爭為綱

TKT

民望沒有最低，只有更低，也沒有低位入市博反彈，而停止下瀉呢回事。根據香港大學民意研究計劃最新發放特首及問責司局長民望數字，特首梁振英評分雖然有所回升，由40分升至42分，但支持率就跌至20%，反對率升至66%，民望淨值為負46%，屬舊年7月1日上任以來最差數字，反對率高達66%，第一次步入「表現拙劣」之列，實際上佢唔止有信任危機，更加陷入咗空前管治危機。                                    

建香港營　一派謊言                                       
究竟乜嘢原因令佢民意淨值去到負46%新低？表面上當然同調查期間有電視發牌、李慧玲、香港芭蕾舞團刪戲及李超人炮轟一連串事件有關。但更深層次原因，係將鬥爭意識帶入政府管治有關。過去由港英時代一路到董建華、曾蔭權兩屆政府，都以折衷調和矛盾為主。香港本質上屬於「一團矛盾」，利益多元分化，商界、建制、泛民、政府內部四處矛盾重重，商界有工業資本vs地產金融資本，地產金融內有李家與反李家集團之爭，但香港之穩定局面來自從不以敵我之分去處理矛盾，所以先至有一團矛盾之說，大家都限遊戲規則玩，政府就居中調和，唔會搞寸個party，令大家上腦發癲。

梁政府就唔同，一切用政治劃線，黨同伐異，希望在上任後立即推翻上手規矩，分派利益予梁營，所謂建立香港營根本係一派謊言。大家只要睜開眼望望公職委任，連機管局咁非政治嘅法定機構，都要搵個羅康瑞去搞航天城圈地，導致火併張建東主席，見微知著，可見梁營越心急做empire building，就越加激化矛盾，令原本建制勢力嚴重削弱，冇人願意為政府決策站台背書，如此一來，管治危機便形成。但梁一直諉過於「少數」針對政府媒體，結果令社會更加割裂。他堅持迎難而上，就係乜嘢都要鬥，同公務員鬥、同傳媒鬥、同唐營鬥、同民意鬥。你越唔鍾意我落區表演，我就偏要做，仲要變本加厲，變成一場又一場澳門式諮詢核突show，令一般市民由反感變成厭惡。

當然，佢唔會反省自己表現拙劣因由，因為有百搭萬能key︰「美國重返亞洲、外國勢力滲入、台獨港獨合流、反共勢力猖獗。」呢套萬能key老董03年都用過，最後亦呃唔到北京。回歸前後香港問題一直以防左為基調，可惜，梁將香港帶入左嘅錯誤之中，香港究竟仲有幾多能耐，畀一個意識及認識均錯誤之人掌舵，而唔出現大規模社會衝突？毓民之言，其實係預警，唔係要恐嚇邊個！                                    

添馬男                                   

                               
登錄/註冊後可看大圖

                               
登錄/註冊後可看大圖