大角嘴 - 港 灣 豪 庭 Metro Harbor View

 找回密碼
 注册
今天是
搜索
查看: 842|回復: 1

接北京來電後 撤六四死萬人報道 《香港01》創辦人繞編採部抽稿

[複製鏈接]
發表於 2017-12-29 00:53:33 | 顯示全部樓層 |閱讀模式
網媒《香港01》早前刊登英國檔案館最新一批六四解密文件的報道,文章其後被抽起,經大幅修改後再次上載。《蘋果》接獲《01》內部消息指,文章刊出當日,其創辦人、南海控股有限公司主席于品海收到來電,指有「北京上面嘅人」留意到有關報道,遂繞過編採部,直接向技術部下令抽起文章,把其中一名提供情報者的身份由國務委員,改為國務院「員工」;《01》執行總編輯戚本業否認于曾收有關電話。

記者 趙雅婷
《01》於本月20日早上刊出兩篇文章,其中一篇標題為《英引中國國務院情報 27軍掃射軍人 逾萬平民死亡》,其後文章一度被抽起,至當日下午5時許再次上載,內容經大幅修改,包括標題刪去「逾萬平民死亡」。

《蘋果》接獲《香港01》內部消息指,報道刊出當日,于品海接到來自旗下被視為「親習媒體」的北京《多維新聞》一名人員來電,向他轉述有來自「北京上面嘅人」留意到有關報道,于品海遂繞過編採部,直接向技術部職員下令抽起文章。據了解,該文最令北京關注的,是指向英方提供情報的國務委員(member of State Council),同日下午5時左右,該網把國務委員一詞,改為國務院「成員」,在當晚近8時,再改成「員工」。

據記協早前了解,有關系列報道原定於12月20及21日兩日刊出,該網高層其後擱置21日刊出的第二批文章。《蘋果》取得第二批文章以及有關系列報道的稿單,已經完成的文章有三篇,標題分別為《成都鎮壓300人亡 各地屢傳戒嚴》丶《英國押錯注 先後捧趙紫陽喬石 驚訝江澤民上位》丶以及引述由香港眾志及本土研究社發起的「香港前途研究計劃」早前發表的文章,標題定為《指六四後藉機加辣23條》。另外,稿單中還有一篇待定的《六四後屢傳鄧小平死訊 英國內部就是否致唁電現分歧》文章尚未撰寫。

消息指,《成都鎮壓》及《英國押錯注》早已上載至《01》內部系統CMS,並製作成網頁版htm檔案,包括配圖丶相關文章連結及文章標籤等;根據《蘋果》取得的htm檔案顯示,該兩篇文章的最後更新時間分別為本月21日凌晨4時54分及凌晨5時07分。

消息人士指,負責記者於20日仍撰寫第二批文章,「以為會照常21號出,一直開緊工」,至21日方知文章已被擱置。該名消息人士亦指,《01》執行總編輯戚本業20日曾召開會議向員工解釋事件,並轉述于品海收到電話的消息。

戚本業回應《蘋果》查詢時否認有關來電,以及他本人曾召開會議向員工轉述此事,「據我所知唔係事實,全部都係誤解,冇咩會丶咩電話,簡直一派胡言」,至於原定本月21日刊出的文章,戚本業指「不嬲都係話留返部分(來年5月方刊出)。」和他早前回應《明報》時指「未有計劃再推出相關報道」的說法明顯矛盾。

《01》昨晚9時就事件發表公開聲明,指當日撤回文章是由於負責記者將情報紀錄誤當權威文件,下了「還原歷史」斷論,以至不妥翻譯文件,到發現問題時急忙撤稿重審。聲明指,事件不存在「政治審查」,只有「品質審查」。

記協早前發聲明指該文章曾一度被撤,後來經新聞部爭取,經多處修改後再於下午5時左右上載,《01》聲明指該指控屬子虛烏有。記協亦指,原定21日刊出的第二批文章遭擱置,認為做法不尋常,憂涉政治因素,《01》聲明回應指,於首兩篇文章刊出後,認為其適宜於來年5月丶即六四29周年前方刊出,並無記協所稱的不尋常事發生,批評記協越俎代庖,指「不需記協指教」。

《蘋果》向《01》總編輯龍景昌查詢,截稿前未獲回覆。

                               
登錄/註冊後可看大圖




 樓主| 發表於 2017-12-29 02:55:51 | 顯示全部樓層
英國六四檔案解密揭中共「深喉」 認殺逾萬人真相係點?

英國國家檔案館早前解密1989年六四天安門事件數千頁封塵外交檔案,原本無咩人關注,卻因網媒「HK01」發生咗疑因老闆壓力被迫刪改獨家報道嘅新聞,突然又引起唔少人興趣。查實,呢份檔案最爆嘅其中一個地方,就係當年英國駐華大使唐納德(Alan Donald)收料嘅「線人」竟然係member of State Council,按照中共慣用嘅譯法就係「國務院委員」,咁即係當年喺中共高層裏面有「深喉」,洩漏咗中共喺六四屠城發生後所做嘅第一手形勢評估。呢件事其實相當嚴重,但香港傳媒近日嘅相關報道並無深挖落去,對了解六四真相似乎有點可惜。

能夠做得「深喉」,應該有番咁上下斤兩,絕對唔會係國務院裏面嘅二打六又或者普通「職員」。你要知道喎,當年資訊科技無今日咁發達,能夠喺六四屠城第二日,已經掌握到咁多細節,包括執行「暴行」嘅係來自山西第27軍,當中60%係文盲或低學歷人士,又講到楊尚昆同鄧小平好老友,國務院一啲委員認為內戰迫在眉睫,仲估計當時平民死亡人數至少10,000。呢個數字咪同2014年6月,《壹週刊》翻查美國白宮解密檔案,發現華府喺六四後不久收到北京戒嚴部隊線人密件,指六四屠城有10,454人被殺大致相同囉。

嘩,呢啲資料喺當時嚟講,應該係國家秘密喎,只有極少數人掌握得到,咁樣講畀外國人聽,似乎有洩密之嫌囉。難怪英國呢份歷史檔案雖然解咗密,但有關呢位「深喉」個名,就特別塗黑咗啦。由此可見,此人身份極敏感,至今仍不能公開,按照正常推斷,有可能一係佢仲未死,公開咗佢個名,會令佢身陷險境,亦都可能違背咗佢同唐納德當年嘅保密約定;二係公開佢個名會影響英國外交及戰略利益。

據英國《獨立報》報道,唐納德稱呼呢位線人為「好朋友」,並指佢之前提供嘅消息均證實準確,即係佢做咗唐納德「條針」已有一段時間。仲有一點就係唐納德對呢位線人評價甚高,話佢識得將事實(fact)、推測(speculation)和傳聞(rumour)分類,換句話講就係認為佢當時放出嚟啲料係堅啦。

根據中共公開資料,中共第七屆(1988年-1993年)國務委員先後有十人,分別為:李鐵映、秦基偉、王丙乾、宋健、王芳、鄒家華、李貴鮮、陳希同、陳俊生、錢其琛。海外華文媒體「中國禁聞網」日前就轉載咗一篇評論指,當年最可能知六四屠城具體內幕嘅國務委員,係兼任國防部長嘅秦基偉。曾有報道指,秦基偉當時曾試圖同趙紫陽形成同盟,反對戒嚴令。

另外,兼任國務委員嘅時任公安部長王芳,亦有可能清楚六四屠城嘅內情。佢喺1990年就辭咗公安部長一職,3年後更退埋休。最可圈可點嘅係,嗰篇評論話,王芳喺個人回憶錄中,評論自己喺六四時嘅所作所為時講咗句:「如果是錯誤的,我將成為歷史罪人」。

不過咁,呢啲都係估估下,純粹猜測,根本無真憑確據話邊個邊個就係「深喉」。除非有一日,當事人走出嚟承認佢就係「深喉」;又或者最初睇過唐納德嗰啲電報、外交檔案嘅英國官員爆響口;仲有可能係中共「變天」,六四得到平反,有人申請將塗黑咗嘅資料還原解密,但要待多十年、二十年、三十年……係咪有呢一日,真係無人知。
您需要登錄後才可以回帖 登錄 | 注册

本版積分規則

Archiver|手机版|小黑屋|港灣豪庭論壇 admin@mhvlive.com

GMT+8, 2024-3-28 22:55 , Processed in 0.019522 second(s), 16 queries .

Metro Harbor Village Forum mhvlive X3.4

mhvlive © 2008-2022, Tai Kok Tsui

快速回復 返回頂部 返回列表